Suspendido karon ang coach ug ingon man ang kinatibuk-ang football team sa Abellana National School (ANS).
Kini human masayri ni DepEd Cebu City Schools Division Superintendent Dr. Lorna Rances nga misalmot kini og usa ka torneyo nga wala kaniya magpahibawo.
Sa sulat ngadto sa principal sa ANS nga si Ernesto Jacel, si Dr. Rances mi-order og usa ka tuig nga suspensiyon ngadto sa nahisgutang football squad nga gipangulohan sa ilang head coach Francis Ramirez.
Ang torneyo nga gipasabot ni Dr. Rances mao ang Visayas eliminations sa 2008 Philippine Olympic Festival (POF) niadtong Hulyo 23-27 didto sa Dumaguete City.
Ang ANS nakakuha’g katungod nga maoy mokampanya sa Cebu sa regionals human manghawod sa 8th Inter-Club Football Cup.
Apan nasayran nga ang nahisgutang football team sa siyudad nidala sa ngalan sa Probinsiya sa Sugbu.
Sa samang higayon giingong nasuko usab si Cebu City Mayor Tomas Osmeña human masayod sa gihimo sa nahisgutang football team.
Matud pa ni City Hall Education Consultant Joy Augustus Young nga ang gikasuk-an sa mayor mao ang pagpalta sa mga tinun-an sa ilang klase.
Ang suspensiyon gisugdan niadtong Agosto 15. Ang maong suspensiyon nagpasabot nga si Ramirez ug ang ANS booters gidid-an pagsalmot og mga school-based competitions ubos sa superbisyon sa DepEd sama sa Milo Little Olympics ug Cebu City Olympics, ang qualifying alang sa Central Visayas Regional Athletic Association (CVIRAA) Meet diin ang mga mananaog maoy morepresentar sa rehiyon alang sa Palarong Pambansa.
Hinuon, si Ramirez mihangyo nga dili lang pahamtangan og silot ang iyang mga magduduwa. - BANAT