Bautista, Nietes modepensa na

Naghinam-hinam na sila si Rey 'Boom Boom' Bautista ug Donnie 'Ahas' Nietes sa ALA Boxing Gym nga modepensa sa tagsa-tagsa nila ka korona karong gabii sa Pacific grand ballroom sa Waterfront-Cebu City Hotel and Casino.

Si Bautista (26-1, 18KOs) manalipod sa iyang WBO International super bantamweight title batok ni Eden 'Anestesista' Marquez (16-3-3, 12KOs) sa Mexico, samtang si Nietes (22-1-3, 13KOs) modepensa sa iyang korona isip WBO minimumweight champion batok ni Eddy 'Torito II' Castro (12-3-1, 9KOs) sa Nicaragua sa supporting main event sa eksplosibong "WBO Night of Champions" card nga gipasiugdahan sa ALA Promotions inabagan sa ABS-CBN Sports.

"Excited na kaayo ko nga mo-away. Duna gyud matikangkang ani namong duha," matud pa sa 22-anyos nga si Bautista kinsa mipasalig nga iyang palukapahon si Marquez kun adunay oportunidad.

Mao kini ang ikaduhang pagdepensa ni Bautista sa WBO regional title nga iyang nasakmit human gipukan ang Mehikanong si Antonio 'Barrio' Meza pinaagi sa 12-round unanimous decision niadtong Disyembre 2 sa miaging tuig didto sa Araneta Coliseum.

Sa miagi niyang away niadtong Abril 6 didto gihapon sa Big Dome, si Bautista mipakamang ni Genaro Camargo sud lamang sa duha ka hugna.

Sa iyang bahin, si Nietes nagpangagot na sab nga mobuhi og kumo gumikan kay wala na man siya maka-away pa sukad siya mikulit og kasaysayan isip labing unang world champion sa ALA Stable human niya gibuntog si Thai Pornsawan Kratingdaenggym niadtong Septiyembre 30, 2007 diha gihapon sa Waterfront Hotel.

"Hapit na mag-usa ka tuig nga wala ko ka-away mao na nga uhaw na kaayo ko mo-away. Lami na kaayo isukmag ug ako gyud ni siyang tumbahon," bahad pa ni Nietes.

Sa kulbahinam nga undercards, upat ka bag-ong sulbong nga talento sa ALA ang mowadwad sa ilang abilidad. Sila mao si WBO Youth lightweight champion Jason Pagara, Jomanz Omanz, Weng Haya ug Rey Las Piñas.

Si Pagara makigharong ni Thai Kongdej Sithtrajtrakan, si Omanz makigsangka batok ni kanhi WBC International bantamweight champion Roger Galicia, si Haya makig-engkuwentro ni Ricky Sismundo, samtang si Las Piñas makigbinukbukay ni Gideon Amba.

Lain pang mobanat mao sila si Jerson Mancio batok ni Mario Suson ug Fil-Am JV 'Fighting Doc' Tuason sa New Jersey vs. Albert Villacampa, lumad nga taga isla sa Bantayan.