Ruelo nanghawod sa 16th Shell Chess

Ang 17-anyos nga si Bernardo Ruelo Jr. maoy  gikoronahan isip kampiyon sa  bag-o lang natapos nga 16th Shell National Youth Active Chess Tournament sa SM City Entertainment Center.

Si Ruelo mirehistro og 35.5 puntos sa dayong tapos sa maong torneyo aron paghari sa  Juniors Division nga gisalmotan  sa 218 ka mga partisipante.

Gisundan kini nilang Lenon Hart Salgados alang sa ikaduhang dapit ug Recarte Tiauson, kinsa mikapyot sa ikatulo nga dapit.

Sa laing bahin, tinun-an sa Southwestern University nga si Rhenzkie Kyle Sevillano mao usab ang nanghawod sa Kiddies Division.

Ang 9-anyos nga si Sevillano mitapos sa torneyo bitbit ang siyete puntos. Sila si Godfrey Villamor ug Marq Gabrielle Balbona maoy miangkon sa ikaduha ug ikatulo nga dapit.

Gipasidunggan sab si Rachel Suson kinsa nidaog sa "Sportsmanship" award, samtang ang 4-anyos nga Jeth Romy Morado mao sab ang nidaog sa "Youngest Player" award ning tinuig nga kompetisyon nga gipasiugdahan sa Pilipinas Shell Petroleum Corporation.