Baluarte modepensa karong Agosto 27

Andam na ang Pinoy'ng si Eusebio Baluarte, Jr. nga modepensa sa iyang WBO Asia Pacific youth welterweight title batok ni Heri Adrianto sa Indonesia  sa "Rumble in MisOr, the Defense" karong Agosto 27 didto sa Atrium, Limketkai Mall sa Cagayan de Oro  City.

Mao kini ang  labing unang title defense ni Baluarte human niya nailog ang bakanteng korona pinaagi sa first-round knockout batok ni Thai Yai Sithsaithong niadtong Abril didto sa MPSC Gym sa Cagayan de Oro.

Si Baluarte lumad nga taga-Bukidnon nagbitbit og limpiyong 5-0, 5KOs nga baraha.

Samtang si Andrianto, kinsa naghupot og   12-5-1, 8KOs mosulong sa Pilipinas sa ikaduhang higayon sa tuyo nga mahugawan ang rekord sa Pinoy. 

Unang misulong dinhi sa Pilipinas si Adrianto niadtong miaging Mayo diin iyang gikasangka si Jason Pagara apan napilde kini.

Si Pagara, 16-anyos, mokatkat sab sa ring karong Agosto 30 sa “WBO, Nights of the Champions” diha sa Waterfront Cebu City Hotel sa Lahug, ning siyudad.

Ang “Rumble in MisOr, the Defense” gipasiugdahan ni Leonel Lazarito sa Bukidnon uban sa suporta ni Provincial Governor Oscar Moreno.