Si taekwondo jin Mary Antoinette Rivero ug si diver Ryan Rexel Fabriga mao na lang ang nagpabiling nagbarog ug nahabiling paglaum sa Pilipinas nga makaangkon og medalya sa 2008 Beijing Olympic Games sa China.
Nagmasulob-on ang Pilipinas gumikan kay walay bisan usa ang nakahakot og medalya sa Olympics.
Unang napakyas ang shooter nga si Patrick Ang ug ang boxer nga si Harry Tanamor. Ning bag-o lang wala na usab kaugpo ang Pinoy nga si Tshomme Go ug napildi kini sa iyang away sa taekwondo.
Sa iyang bahin, si Rivero naglaraw nga motapak sa napilding si Go ug ang tumong niya karon mao ang pagdaog og bulawan sa taekwondo.
Si Rivero makigsangka karong adlawa batok ni Sandra Saric sa Croatia sa round 16 sa taekwondo welterweight division didto sa Beijing University of Science and Technology.
Kun modaug si Rivero sa first round motabok siya ngadto sa quarterfinals diin iyang makontra si Hwang Kyun-seon sa Korea. Ug kun modaog gihapon si Rivero batok ni Hwang moabante kini sa semifinal round ug posibleng iyang harungon ang twice silver medalist nga si Gwladys Epangue sa France.
Sa laing bahin, si Fabriga makigsangka sab karon sa mga Chinese world class divers nga gikatakda sa alas-5:30 sa hapon. Si Fabriga maoy kampiyon niadtong 2005 ug 2007 Southeast Asian Games.