Upat nalang ang nagpabilin sa Beijing

Nagkagamay nalang ang oras nga nahibilin sa Philippine Team arun maka-angkon og medalya sa nagpadayong 2008 Beijing Olympics, uban sa pagkahilis sa oras sunod-sunod usab nga napukan ang atong mga atletang Pinoy.11 sa 15 ka mga magduduwa sa nasud ang namauli nga walay laing gidala kundi ang ilang kapakyasan sa Olympic.Sa pagkakaron upat nalang ka mga atletang Pinoy ang nagpabilin ngadto sa China nga nagpa-abot sa ilang torno aron atubangon ang ilang malisud nga tahas sa pagsakmit og medalya alang sa nasud. Sila si Tshomlee Go ug Mary Antoinette Rivero sa taekwondo, ang diver nga sila si Rexer Ryan Fabriga ug ang pambato  nato sa long jump nga si Marestella Torres mosalang na karong umaabot nga mga adlaw nga magdala sa bandila sa Pilipinas.

Apan sama sa ubang mga atleta si Go ug Rivero makasinati usab og mga babag sa natad sa taekwondo, ang 26-anyos nga si Go makigsangka sa ubang mga banggiitang taekwondo sa kalibutan sa preliminary round sa men’s 58kg class, lakip sa mga muharong ni Go mao si Chu Mu Yen sa Taiwan. Ang 22- anyos nga si Chu maoy misakmit sa gold medal sa 2007 Athens Olympic, laing mobabag ni Go mao ang German nga si Levent Tuncat nga mao ang misakmit sa silver medal sa miaging Olympic.

Sama ni Go si Rivero usab magsagubang og mga lisud nga kontra, duha ka mga top qualifiers sa miaging 2007 world championship nga sila si Hwang Kyung-seon sa Korea ug Gwladys Espangue sa France mao ang migawas nga higpit nga kaatbang ni Rivero sa 58kg women’s class. Apan bisan og dili lalim ang mga atubangon sa mga Pinoy, ang presidente sa Taekwondo Philippines nga si Robert Aventajado nipakita gihapon sa iyang dakung salig nga makabaton sila og medalya,

“I really like our chances. We’ve seen the line-up and I believe our fighter will have a chance to win an Olympic medal depending on the draw,” matud pa ni Aventajado.

Sila si Rivero ug Go mo-away karong umaabot nga Agosto 20 ug 22 didto sa University of Science and Technology Beijing Gymnasium.

Sa iyang bahin, si Torres nga lakip sa wild card entry nagkinahanglang moguba sa iyang personal record nga 6.63 meters sa 2005 SEA games arun malabwan iyang mga kaatbang sa preliminaries karong adlawa didto sa Bird’s Nest Stadium sa Beijing, China.