Laraw karon sa Air21 Express ang pagtapos sa Barangay Ginebra Kings arun masakmit ang labing una nilang kampiyonato sa Game-6 sa ilang “best-of-seven” Finals series sa nagkainit nga aksiyon sa 2008 Smart-PBA Fiesta Conference karong alas 6:30 sa gabii didto sa Araneta Coliseum , Quezon City. Tungod sa ilang kulbahinam nga kadaugan sa Game-5 batok sa Gin Kings , 76-73 , ang Express nakabaton karon og duha ka kahigayunan arun masakmit ang kampiyonato. Ang Express nga mao ang naglabaw sa standing 3-2 nagkinahanglan nalang og usa ka daug arun masakmit ang labing una nilang kampiyonato gikan pa niadtong 2002 diin una silang misalmot sa Philippine Basketball Association (PBA).
Tinguha sa coach sa Express nga si Bo Perasol ang pagpukan sa Gin Kings karong adlawa sa Game-6. Alang kang Perasol kinahanglan nilang mudaog karong adlawa arun dili na matagaan ang Gin Kings og kahigayunan nga musakiyo sa kampiyonato. Bisan paman sa ubos nga field goal percentage sa Express nga igo lang nakapasulod sa 28 sa 78 nila ka tira, daku lang gihapon ang pasalamat ni Perasol tungod sa lig-on nga depensa sa iyang koponan sa Game-5. Si Perasol magsalig gihapon sa iyang mga sinaligang player nga sila si Steven Thomas , Gary David ug Arwind Santos nga maoy mutimon sa Express ngadtu sa kadaugan.
Kahinumduman nga ang Mythical member nga si Santos maoy miluwas sa Express sa Game-5 dihang na-ilog niya ang bola gikan sa pasa ni Eric Menk ngadto kang Mark Caguioa nga miresulta ngadto sa lay-up sa nahibiling 43.3 segundos alang sa labaw 75-73.
Sa ilang bahin , ang Gin Kings nagtinguha nga mudaog aron mapugos ang serye ngadtu sa Game-7 alang sa kahigayunan nga masakmit nila ang ilang ika-walong kampiyonato.”The players should go all-out in Game-6 , it is do or die for the team,” matud pa sa coach sa Gin Kings nga si Jong Uichico. Si Chris Alexander musuway pagkarga sa Gin Kings karung adlawa, si Alexander miposte og 21 puntos sa Game-5 arun pangulohan ang Kings, samtang si Caguioa nagtinguha karong adlawa nga mamawi sa bati nga duwa sa Game-5 diin igo lang siya mi-iskor og syete puntos.