SBC nais makisalo sa ikalawang puwesto

Tangka ng defending champion San Beda College na makisalo sa ikalawang puwesto sa pakikipagsagupa sa Mapua Institute of Technology sa pagpapatuloy ng 84th NCAA seniors basketball tournament na magpapatuloy sa Cuneta Astrodome.

Sasagupain ng SBC Red Lions ang MIT Cardinals sa tampok na laro sa alas-4:00 ng hapon pagkatapos ng sagupaan ng San Sebastian College at University of Perpetual Help Dalta System sa alas-2:00.

Kasalukuyang may 6-2 record ang Bedans na nasa likuran ng nangungunang Letran College na may 7-1 kartada at Jose Rizal University na may 7-2 record.

Makakasalo ng San Beda ang JRU Heavy Bombers sa pamamagitan ng kanilang tagumpay.

Nakasakay sa dalawang sunod na panalo, hangad ng Stags na palawigin ang hawak na 5-4 kartada sa pakikipagharap sa Altas na may isang panalo pa lamang sa walong laro.

Sa juniors division, bubuksan ng SSC Staglets at ng Perpetual Altalletes ang aksiyon sa alas-10:00 ng umaga kasunod ang sagupaan ang SBC Red Cubs at MIT Red Robins sa alas-11:30. (Mae Balbuena)