Upat ka teams ang nag-abot atol sa pagbukas sa ika-43 nga season sa Cebu Professionals Basketball Association, Inc. (CEPBA, Inc.) nga gitawag og President Emiritus Ernesto Elizondo Cup diha sa YMCA gym sa dalan Jones avenue, ning dakbayan. Ang upat ka teams kinsa migamit sa mga ngalan sa ilang sponsors mao ang Toyota Otis-Manila, Cebu Integrated Arrastre (CIA) ni kanhi Konsehal Elizondo, Hotel Fortuna ug Yayoy’s Grill ni Konsehal Raul “Yayoy” Alcoseba.
Ang torneyo gibuksan kaniadtong Hulyo 27 atol sa ilang ika-43 nga season. Ang CEPBA, Inc. nga gilangkuban sa mga kanhi sikat nga basketbolista sa CAAA, natukod kaniadtong Septiyembre 21, 1965 o pito ka tuig sa wala pa ideklarar ang Martial Law. Atol unya sa anibersaryo sa CEPBA, Inc. pagahimoon sab ang awards night ug induction party sa mga opisyales ug mga bag-ong sakop sa grupo nga adto ipahigayon sa Olympic Hall sa Baseline Restaurant sa alas 6 sa hapon diin adya sa’y pagahimoon nga salu-salo.
Gidapit ni Elizondo ang tanang mga sakop sa Cebu sports media sa pagtambong sa ilang anibersaryo ug awarding tungod kay ang tanang motambong makadawat og mga door prizes. Ang CEPBAA, Inc. aduna na karo’y 68 ka miyembro.
Ang usa sa nakapasamot og kahinam sa mga sakop sa CEPBA, Inc. kay ang mahimong kampiyon ning tuiga maoy makadawat sa championship trophy nga hinatag ni President Gloria Macapagal-Arroyo. Ang torneyo pagahimoon nga double round elimination format ug adunay duha ka duwa sa YMCA gym mata’g Domingo.