Cebu Niños gisanta sa Pagadian Explorers

Ang Liga Pilipinas leg champions sa miaging semana -- ang M. Lhuillier-Cebu Niños ug Quezon Red Oilers gisugat og kapildihan batok sa ilang tagsa-tagsa ka kaatbang sa pagsugod sa Mang Inasal Liga Pilipinas Iloilo leg niadtong Miyerkules didto sa University of San Agustin gym sa Iloilo City.

Ang two-leg winner Pagadian Explorers ni Mayor Sammy Co ug coach Eric Samson mirehistro sa ilang ikaduhang daog batok sa Cebu Niños, 91-80. Sila si Rex  Quilo ug Mark Yee miposte og singko puntos matag usa alang sa ilang 10-2 run sa pagsugod sa katapusang kuwarter aron pag-abante og 12 puntos, 75-63.

Sukad niadto, ang Cebu Niños ni businessman Michel Lhuillier ug coach Raul ‘Yayoy’ Alcoseba wala na makarekober hangtod nga nahurot ang gitagal nga oras sa maong duwa.

Si Quilo maoy nangulo sa Explorers nga mibugha og 24 puntos lakip na ang upat ka triples, gisundan ni Yee sa iyang 20 puntos uban ang siyam ka rebounds ug upat ka blocks.

Nangulo sa pilderong Cebu Niños mao si Stephen Padilla, kinsa miposa og upat ka triples sa kinatibuk-ang 20 puntos, samtang si Ron Capati miabuno og 14 puntos.

Sa laing aksiyon, ang host-Iloilo Mang Inasals ni Robert Uy ug coach Jerry Jaranilla milubong sa Red Oilers ni Gov. Raffy Nantes ug coach Oliver Bunye sa iskor nga 92-73.

Si Chito Jaime maoy topscorer sa Mang Inasals nga mikulit og 187 puntos, gisundan ni  Francis Barcellano sa iyang 14 puntos uban ang 11 ka rebounds.

Si Kim Macanig mao usab ang topscorer sa Red Oilers sa iyang 19 puntos, samtang si Jonathan Pinera miamot og 12 puntos.