RP Team mikabkab 20 ka bulawan sa 10th WEKAF Championships

Ang Philippine team miabli sa ilang kampanya pag-ilog og balik sa korona pinaagi sa pagkabkab og 20 gold ug tulo ka silver medals sa pagsugod sa 10th World Eskrima Kali Arnis Federation (WEKAF) Championships kagahapon didto sa Ayala Center Activity Center.

Ang mga Pinoy’ng arsinadors mikabkab og siyam ka bulawan sa traditional single weapon. Nikabkab sab sila og lima ka bulawan sa traditional double weapon ug upat ka non-traditional single weapon.

Si Jhon Limotan, maoy nangulo sa RP team nga mihakot og duha ka bulawan ug usa ka silver sa sayaw (form event).

Nidaog sab si Limotan sa boys 12-13 traditional double weapon uban sa iskor nga 8.3 points. Mihakot sab siya og silver sa non-traditional double weapon nga nadaog ni Pierce Armstrong sa defending champion United States of America.

Laing duha ka Limotans nga sila si Junrey ug Jonel ang mikabkab sab og mga bulawan. Si Junrey maoy nanghawod sa boys 16-17 traditional single weapon, samtang si Jonel naghari sa boys 10-11 division.

Sama ni Jhon Limotan, si Jenny Quimque nidaog sab og duha ka bulawan pinaagi sa 12-13 non-traditional open single ug sa double weapons.

Nakakabig sab og atensiyon si Rochel Quirol human midaog dihang iyang giduwaduwaan si Tamara Delorenzi sa Australia sa girls 18-19 traditional double stick event.

Si Quirol, usa sa nirepresentar sa nasud atol sa arnis exhibition sa 23rd SEA Games, nihimo sa iyang unang duwa sa world championships pinaagi sa pagdaog og bulawan sa iskor nga 9.7 puntos. 

Si Chelsea Pableo, ang anak sa kandidato pagka-Grandmaster nga si  Val Pableo, maoy nidaog sa bulawan sa girls 10-11 traditional single weapon sa iskor nga 8.6 puntos. Si Gabrielle Borces maoy nanghawod sa girls 12-13 non-traditional single weapon, samtang si Frank Borces naghari sa boys 10-11 non-traditional open single weapon.

Lain pang Pinoy kinsa mihakot og bulawan alang sa nasudnong koponan mao sila si Fiona Mendoza sa girls 16-17 traditional open single weapon ug Christian Manahay sa boys 16-17 traditional open single, Kyle Apaap sa boys 10-under traditional single weapon, Jhon Lumapas sa boys 14-15 traditional single weapon ug Ariel Caparoso sa boys 16-17 traditional single weapon.

Wala sab magpapiri sila si Claire Racao kinsa nidaog sa girls 10-under single weapon, Jedah Mosqueda sa 10-11 non-traditional open double stick, Mary Arcilla sa 12-13 non-traditional open single, Arlene Arresti sa traditional single weapon, Irene Apisto sa traditional single stick ug Irish Arresto sa girls 16-17 traditional double weapon.