Tulo ka langyaw’ng protagonista diin usa niini ang babaye gikatakdang mopakita sa ilang abilidad karong adlawa diha sa ALA Gym sa Banilad Town Center (BTC).
Sugdan ang kalihukan sa alas-5:00 sa hapon.
Si World Boxing Association (WBA) no. 6 super flyweight contender Rafael ‘Little Bull’ Concepcion, WBA Intercontinental challenger Carlos ‘Shanghai’ Melo ug ang babayeng boksidor nga si Brenda Shaylor sa Las Vegas ang mopahigayon og public workout ug sa samang higayon bukas kini sa mga Sugbuanong mahiligon og boksing aron makita nila sa personal ang mga boksidor sa dili pa kini mokatkat sa ring karong Sabado sa gabii diha sa Cebu Coliseum.
Si Concepcion miabot kagahapon sa buntag human kini mabiya-i sa iyang flight gikan sa Los Angeles ug miadto kini sa ALA Gym sa BTC.
Uban niya mao ang iyang trainers nga sila si Pedro Roca ug Hector Romero. Ang manedyer niining si Damon de Berry sa Optimum Sports Agency nag-una sa team niadtong Hulyo 18 aron pagseguro nga ang facilities sa training sa ilang boksidor maandam.
Si Shanghai Melo nakaabot sa tukmang panahon niadtong Domingo uban sa iyang trainer nga si Francisco Berrio Arroyo.
Si Melo mohagit ni reigning WBA Intercontinental champion Milan ‘Milenyo’ Melindo alang sa regional title.
Samtang si Shaylor, ang crowd-drawing amazon, kinsa makigsinukliay og kumo batok sa Pinay’ng boksidor Reynalyn Consejo Jacob sa Bacolod City, moapil sab sa public workout uban sa manedyer nga si Tony Martin.
Ang duha niabot kagahapon gikan sa Nevada agi sa Manila. Si Martin mao sab ang paboritong cutman sa ALA Gym team sa ilang nangaging mga away dinhi sa Pilipinas ug sa gawas sa nasud.
Si Concepcion makigsinukliay og kumo batok ni AJ ‘Bazooka’ Banal alang sa bakanteng WBA super flyweight title.
Ang "Laban Na Banal: Panahon Na!" gipasiugdahan sa ALA Promotions uban sa abag sa ABS-CBN Sports, Golden Boy Promotions ug sa Cebu City Government.