Pagadian mikutlo laing titulo

 Wala magpapugong ang Pagadian Explorers pag-ilog sa liderato human mikutlo sa ilang ikaduhang leg title pinaagi sa paglubong sa Taguig Batang Global sa iskor nga 83-56 niadtong Domingo Zamboanga leg final sa Liga Pilipinas Tour elimination phase didto sa Zamboanga City.

Nangulo sa kadaugan sa Pagadian ni coach Eric Samson mao si Erian Daja kinsa mibahog og 16 puntos. Si Daja mao mao sab ang nidagit  MVP award   sa Zamboanga leg human makatigom og 18.4 puntos matag duwa.

Gawas sa ilang mga sentro, ang mga lokal sa Pagadian nga gipangulohan ni  Eric Quilo misuporta sab alang sa  kadaugan. Si Quilo miamot og 12 puntos, samtang si Albert Alberto adunay 10 puntos  alang sa Pagadian kinsa nikolekta og dugang 10 puntos. Ang Pagadian mao na karon nag-una sa  standings nga adunay 29  Tour points. Ilang  naunhan ang M. Lhuillier-Cebu Niños nga adunay 24 puntos. Ang Taguig mipuwesto sa ikatulo sa ilang 23 puntos.

Sa laing bahin, ang Lipa Barakos nagsalig sa ilang kainit sa second quarter ug ilang gipukan ang Tagaytay-Cavite Heroes sa iskor nga 81-72 aron pagdaog sa Batangas leg.

Ang Barakos nga gipangulohan ni Al Vergara sa iyang 15 puntos miinat sa ilang  21-14 sa first quarter  ngadto sa 43-28 ug wala na kini motugot nga makagukod pa ang Cavite Heroes.