BCAP walay dapigan

Ang Basketball Coaches Association of the Philippines (BCAP) nga gipangulohan sa ilang presidente nga si Chito Narvasa, kinsa mao sab ang UAAP commissioner walay gidapigan sa panagbangi tali nilang Prospero Pichay ug  Manny V. Pangilinan nga nagkainitay tungod sa liderato sa Basketball Association of  the Philippines-Samahang Basketbol ng Pilipinas (BAP-SBP).

Si Narvasa kinsa mibisita dinhi sa Sugbu niadtong miaging adlaw  nagkanayon nga dili sila manghilabot bisan og si kinsa maoy modala sa BAP-SBP kay ang ilang grupo usa man ka independente.

Si Narvasa  giubanan sa iyang manghod nga si Atty. Ogie Narvasa ug ni BCAP secretary-general Tanny Gonzales,  kinsa maoy athletic director sa Lyceum of the Philippines.

Matud pa niya nga ang ilang pagduaw sa Sugbu walay kalabotan sa UAAP ug  wala sab magpasabot nga mibuwag na sila kang Pangilinan, apan gusto lang sila mosaksi sa duwa sa nagpadayon nga 6th Asian University Basketball Championship (AUBC) isip suporta ni Cebu Schools Athletic Foundation, Inc. (CESAFI) commissioner Felix O. Tiukinhoy, Jr.,  kinsa ilang nakaila sukad pa sa tuig 1991.

Gawas sa pagpaluyo sa mga kalihukan ni Tiukinhoy dinhi sa Sugbu, si Narvasa ug kaubanan mibisita sa Sugbu aron sa pagpalambo sa BCAP diin aduna silay gilaraw nga usa ka seminar/workshop.

Ang BCAP nga  gibana-banang adunay 800 ka mga miyembro, modawat  bisa’g dili mga coaches kay matud pa niya usa kini ka matang sa brotherhood dili lang usa ka grupo. Ang mga sakop sa BCAP dinhi sa Sugbu naglakip nilang Jay Ramirez, Al Solis, Tata Merced ug  Jake Rojas.