UV 2-0 na sa AUBC

Wala man tuod kanila ang ilang mga higante apan ang 6-11 nga si Gregory Slaughter pabiling maoy dakung paglaum sa kampanya sa University of the Visayas (UV) Green Lancers kinsa aduna nay 2-0 nga baraha human ilang gilampurnas ang Angeles University Foundation (AUF) Great Danes , 89-69 sa nagpadayon nga 6th Asian University Basketball Championship (AUBC) Battle of Champions sa Cebu Coliseum.

Mga duwa karon: (Cebu Coliseum)

4pm SWU vs. AUF

6pm Hang Yang vs. U. of Luzon

Ning pagsuwat, ang Huaquiao University sa China nagtinguha sab pagkulit sa ilang ikaduhang daug dihang ilang gikasangka ang University of Luzon samtang didto sa amihang dakbayan sa Bogo City, ang Southwestern University (SWU) Cobras naglaraw sab pagkulit og laing daug alang sa 2-0 nga baraha batok sa Hang Yang University sa South Korea.

Si Slaughter nawad-an nag maka-abag kaniya sa ilawom nga sila si Rino Berame, Ariel Mepaña ug Eduardo Arda apan pabilin siyang nanglimbasog aron pagbaswat sa Lancers ngadto sa ilang ikaduha nga kadaugan. Si Slaughter maoy nangu sa Lancers sa iyang 29 puntos human siya maka-iskor og 15 puntos batok sa Hang Yang University sa miaging adlaw.

Mi-iskor sab si Harlow Chad Villanil og 15 puntos susama sa unang duwa samtang si Chris Victor Diputado mitampo ug 14 puntos.

Nagsugod og arangkada ang Lancers sa third period ug gitiwasan nila ang AUF didto na sa fourth period hangtod nahitabo ang ejection nilang Ritchum Dennison sa UV ug si Limeul Mosies Manarang sa AUF sa may 7:22 ang oras ug ang Lancers naglabaw, 69-52 diha gihapon sa nahisgotang fourth period.

Si Matthew Gray Carney maoy nangu sa AUF sa iyang 16 puntos ug si Anthony Mallari mi-iskor og 14 puntos.  Ang Lancers kinsa midaug batok sa Hang Yang University, 83-77 samtang ang mas tag-as Huaquaio University midaug batok sa AUF, 87-74.Ang AUF aduna nay duha ka pilde karon sa maong torneyo.

Si Dennison maoy mi-iskor og 17 puntos sa miaging adlaw ug sila si Slaughter ug Villanil parehong may 15 puntos.

Si Song Chang Yong maoy nangu sa Hang Yang sa iyang 16 puntos ug si Lee Sang Il may 15 points. Ang ilang mga tirada tataw kaayo nga sinundog sa Korean legend nga Shin Dong Pa.

Puntos kada usa:

UV (89) — Slaughter 29, Villanil 15, Diputado 14, Lanete 9, Cincoflores 6, Sendrijas 5, Mercader 5, Lao 3, Dennison 2, Lasala 1

AUF (69) — Carney 16, Mallari 14, Santos 9, Gomez 8, Musni 6, Manarang 6, Mendoza 4, Gigante 2, Dumlao 2, Torres 2 Halftime: 35-32.