B-Meg nakakuha og luna sa finals
Nagkinahanglan pa og overtime ang defending champion B-Meg ‘85 sa wala pa nila maangkon ang 87-80 nga kadaugan batok sa Heartvit aron pagharos sa ilang “best-of-three” semifinal series sa 2008 San Carlos Boys High Alumni Basketball Association (SCBHABA) season didto sa University of San Carlos (USC)-North Campus gym.
Gumikan niini, ang B-Meg maoy nakuha sa katapusang lingkoranan sa finals diin ilang sangkaon ang Diabet ‘88 alang sa korona sa Division I.
Ang B-Meg mipapas sa sayes puntos nga labaw sa Heartvit sa katapusang dos minutos sa duwa luyo sa paningkamot ni former pro ug commercial star Lou Regidor.
Si Jone Sepe mipasud og baseline jumper gikan sa assist ni Regidor sa nahabiling 32 segundos sa final quarter aron pagtabla, 73-all nga naghatod sa duwa ngadto sa overtime.
Sa dugang singko minutos, nangatol ang mga kamot ni Regidor diin mibugha kini og 10 puntos sa iyang game-high 40 puntos aron pangulohan ang B-Meg ‘85 ngadto sa kadaugan.
Miabag sab si Roy Aznar pinaagi sa iyang 13 puntos, samtang si Sepe mihirit og 11 puntos alang sa B-Meg nga padayong naghari sa Division I sukad sa pagtukod sa SCBHABA niadtong 2001.
Si Pepito maoy nangulo sa Heartvit nga mipupo og 24 puntos, gisundan ni Noli Romarate nga miani og 20 puntos.
PUNTOS MATAG
B-Meg ‘85/84 (87) – Regidor 40, Aznar 13, Sepe 11, Torrejos 9, Diaz 6, Pua 5, Bacaltos 3
Heartvit ’86 (80) – Mata 24, Romarate 20, Villamor 11, Angan 8,
- Latest
- Trending
