Andam na ang St. Augustine Cup 2008

Kapugngan pay baha, nungka ang pagpahigayon sa St. Augustine Cup 2008 nga mosikad karong Domingo sa alas-2:00 sa hapon diha sa Inayawan Sports Complex.

Sa pagsuwat niini, aduna nay 31 ka teams ang nakaparehistro nga gibuakbuak ngadto sa 17 sa juniors division, pito sa seniors division ug laing pito sa open division.

Mga koponan sa Juniors division gilangkuban sa Sitio Plus, Sitio Babaw, Sitio Lomboy, St. Augustine, Sea Lions, Tunob-lapok, Dumpsite, Summer Land, Sitio Little Plaza, Tira Dulce, Romblon, Greenfield, Torre, San Antonio de Padua, ISSA ug D' WHO.

Naglangkob sa Seniors division mao ang ACT, Salazar, Aces, Harume, Bgry. San Antonio , George Resto Bar ug ang AAA sa barangay Pardo, samtang sa Open category  mao ang San Isidro sa Talisay, Bgry. Suba, Bgry. Mambaling, Bgry. Quiot, Bgry. Pahina San Nicolas ug Geycer Merchandise.

Ang deadline sa pagpangrehistro hangtod lamang karong Domingo nga mao sab ang adlaw sa pormal nga pagbukas nga tambungan nilang South District City Councilor Richie Osmeña, uban sa mga barangay captains sa mga partisipanteng koponan.

Sama sa naandan, magsugod ang maong programa pinaagi sa usa ka parada nga motimaan sa pagbukas.

Molamas sa opening ceremonies mao  ang  pagpili og “best   muse”   ug   “best  in  uniform.”

Gawas sa tropeyo, ang makampiyon sa Juniors division makadawat og P8,000, ang second placer mobulsa og P7,000, ang third placer makaangkon og P6,000 ug ang fourth placer makadawat og P5,000.

Sa Seniors division, ang makampiyon makaangkon og P15,000, ang ikaduha P10,000, ang ikatulo P7,000 ug ang ikaupat hatagan og P5,000, samtang sa Open Category, ang kampiyon makabira og P25,000, mopahiluna sa ikaduha makadawat og P20,000, ang ikatulo makaangkon og P15,000 ug ang ikaupat gantihan og P10,000.

Ang St. Augustine Cup 2008 gipasiugdahan nilang  Jose Labaya ug Lito Comendador  uban sa suporta sa Inayawan Barangay Council ubos sa liderato ni Bgry. Capt. Rustom C. Ignacio.