Laurente milampus sa US debut

Nagmalampuson sa iyang US debut ang batos sa Elorde Stable nga si Dennis Laurente human niya palukapaha ang kaatbang nga Puerto Rican nga si Steve Quiñones sa ikaupat nga round sa undercard sa sangka ni Manny “Pacman” Pacquiao batok sa Mexican-American nga si David Diaz.

Si Laurente nakigharong sa lightweight division batok ni Quiñones, ang naulahi midominar sa tulo ka rounds pinaagi sa pagpaulan og mga kumbinasyong kumo ngadto sa Pinoy boxer.

Apan pipila ka minutos una pa matapos ang fourth round diha sa nawong ni Quiñones usa ka bomba ang gibuhian ni Laurente nga maoy nakapaluhod sa Puerto Rican.

Usa ka makabungog nga right counter punch ang gipatugpa ni Laurente nga nakapatay-og kang Quiñones apan ang naulahi daling mibarog apan gisugat siya sa walang kinumo sa Pinoy hinungdan sa pagkalukapa niini pag-usab.

Dihang mitindog si Quiñones wala na papadayona sa referee ang away tungod sa pagkatakilpo sa walang tikod niini ug nagtakiang nga gidala ngadto sa iyang corner, ang mga batos sa Puerto Rican daling miisa sa puti nga panyo timaan sa pagsurender.

Nasayran nga si Quiñones maoy usa sa mga sparring partners ni Pacquiao apan gihulagway kini sa mga ring announcers nga dili kaayo impresibo ang record tungod kay 10 ra sa 30 niini ka daug ang na KO ug 13 ang pilde ug usa ang tabla.

Samtang si Laurente misaka ang record ngadto na sa 29-3-5 win-loss-draw record nga gibulak-bulakan og 15 ka knockouts.