Mandaue Jaycees, RC Goldline-Alcatel sa JBA finals

Ang way pildeng Mandaue Jaycees ug ang RC Goldline-Alcatel mi-abante na ngadto sa Jaycees Basketball Association (JBA) 2008 President’s Cup finals human ilang gipukan ang tagsa-tagsa nila ka kaatbang didto sa City Sports Club-Cebu.

Unang nakasakmit og luna sa finals ang Mandaue Jaycees ni Joey Cal dihang ilang gitiwasan ang Cebu Dencraft ni playing coach Dr. Boy Te, 92-82, samtang gidaro sa Goldline ang Landview Property, 84-66 aron pagkuha sa katapusang luna sa finals.

Ang Cebu Dencraft ug ang Landview maoy mag-ilog alang sa ikatulong pwesto.

Ang Mandaue Jaycees nga gipangulohan nilang Nestor Patindol, Edgar Colina ug Romy Toledo miabante og 19 puntos sa first quarter, 30-11.

Mihulga og rally ang  Cebu Dencraft apan wala kini panumbalinga sa Mandaue Jaycees kinsa padayon sab nga mipabuhagay sa ilang nagbagang opensa.

Sa laing bahin, sila si Dennis Que ug Dave Lim nagkumboya og 49  aron pangulohan ang RC Goldline. 

PUNTOS MATAG USA

Unang duwa:

Mandaue Jaycees (92) --Patindol 24, Colina 15, R. Garcia 13, Toledo 10, Ong 8, Lerio 6, Latonio 6, Balbuena 5, P. Garcia 5, Cal 2

Cebu Dencraft (82) -- Jayme 31, Sta. Maria 16, Noel 13, Te 10, Yu 6, Salgado 2, Seno 2, Lim 2

Ikaduhang duwa:

RC Goldline (84) -- Que 28, Lim 21, So 19, Maal 10, go 4, Godillano 2
Landview (66) -- O. Go 15, Lao 14, ang 13, Tan 10, Gollon 6, M Hing 4, Co 2, D Hing 1, Sy 1

(Gabby G. Malagar)