Armean MVP sa Sobra Kuwarenta 3-on-3

Giugkat ni Erwin Armean ang MVP trophy sa Vice Mayor Ember Alinsug "Sobra sa Kuwarente" 3-on-3 basketball tournament niadtong miaging semana didto sa Consolacion Sports Complex.

Gihatag ang maong award ngadto ni Armean human gihatod ang iyang team sa kampiyonato. Miduwa siya uban nilang Roberto Malagar, Pictoy Paramel ug Stephen Lada.

Sila si Litoy Pascua, Joebert Tibon, Nolberto Cejas ug Rubin Gasal mitapos sa ikaduha, samtang sila si Clifford Bio, Roelito Bankal, Boy Pitogo ug Marjorie Arrofo maoy mi-okupar sa ikatulong dapit.

Gawas sa mga tropeyo, medalya ug bola, ang kampiyon nibulsa sab og P5,000, samtang ang mipahiluna sa ikaduha ug ikatulo nga dapit nakadawat og P3,000 ug P1,000.

Si Paul Flores, ang event coordinator, miingon nga si Vice Mayor Ember Alinsug naglaraw nga mopahigayon og susama nga torneyo nga naglatid og lima ka dibisyon -- 12-under, 18-under, 21-under, 35-under ug 40-above.

 Pagapasiugdahan kini sa Consolacion Selection Team nga gipangulohan ni konsehal Alelu Flores.