Donaire ‘di na makapaghintay

Hindi na makapaghintay ng tawag ang kampo ni world flyweight champion Nonito ‘The Filipino Flash’ Donaire, Jr. mula kay American promoter Gary Shaw. 

Ibinunyag kahapon ng American manager ng 24-anyos na si Donaire na si Cameron Dunkin na aakyat na lamang ng timbang ang flyweight titlist ng International Boxing Federation (IBF) at International Boxing Organization (IBO).

 Kabilang sa mga posibleng maka-tapat ni Donaire sa super flyweight ay sina World Boxing Organization (WBO) king Fernando Montiel at World Boxing Council (WBC) at World Boxing Association (WBA) ruler Christian Mijares.  

“It looks like that’s where the money is,” wika ni Dunkin. “We could after either one of them because Mijares has been impressive since he beat Jorge Arce and Montiel is looking strong as well.”

 Matapos ang matagumpay na unang title defense kay Mexican challenger Luis Maldonado via eight-round TKO noong Disyembre 1 sa Mashantucket, Connecticut, hindi pa naitatakda ni Shaw ang ikalawang pagdedepensa ni Donaire sa kanyang hawak na IBF at IBO flyweight belts.

Sa huling pakikipag-usap nina Donaire at Dunkin kay Shaw, sinabi nitong paplantsahin pa ang ikalawang title defense ng tubong General Santos City sa Agosto 2.

Ang nasabing petsa ay ang pagdedepensa ni IBF super flyweight titlist Dimitri Kirilov kay Armenian challenger Vic Darchinyan, inagawan ni Donaire ng IBF at IBO flyweight titles via 5th round TKO noong Hulyo 7 ng 2007. (RCadayona)