Mandaue Jaycees giluwas ni Patindol

Gisalbar ni Nestor Patindol ang Mandaue Jaycees  ni Joey Cal pinaagi sa pagpasulod sa iyang mahinungdanong baskets sa nahabiling dos segundos sa ilang kulbahinam nga duwa batok sa Versacool sa Jaycees Basketball Association (JBA) President's Cup 2008 niadtong Martes didto sa City Sports Club-Cebu gym sa Cebu Business Park.

Sa  maong kadaugan ang Mandaue Jaycees nagsolo  sa liderato karon nga adunay 3-0 nga baraha.

Sikit  kaayo ang maong duwa tungod kay  human  sa panagtabla, 32-all sa halftime,  ang Mandaue igo man lang nakalabaw og uno punto   pagkatapos sa third period, 52-51.  Sa nahabiling 7.3 segundos, ang Versacool nag-ong-ong na unta sa kadaugan human mapasulod ni Jeremy Huang ang usa sa duha niya ka free throws aron hatagan ang iyang koponan og uno punto nga labaw, 70-69, apan si Patindol bisa'g gihigpitan og  bantay nakahigayon og buhi sa iyang mahinungdanong itsa sa katapusang dos segundos nga nakapahimo niyang bayani sa maong kadaugan.

Si Patindol maoy nangu sa Mandaue Jaycees sa iyang 18 puntos, samtang si Edgar Colina mitampo og 12 puntos.

Si Huang mibahog og 28 puntos ug  si Benedict Chua mihipos og 16 puntos alang sa Versacool. Si Odullo gikandadohan  og 12 puntos,  ang  iyang  labing ubos nga iskor sulod sa tulo ka duwa.

Sa laing aksiyon, ang Landview milubong sa Dencraft, 81-63  pinaagi sa pagpangulo ni Pocholo Lao sa iyang 23 puntos, samtang si Peter Sta. Maria mi-iskor sab og 23 puntos  alang sa  pilderong Dencraft.

Puntos MATAG usa

Unang duwa:

Mandaue Jaycees (71) --Patindol 18, Colina 12, Magallano 6. Garxia 6, Ong 6, Latonio 6, Cortes 5. E. Latonio 4, P. Garcia 3, Balbunea 2, Cal 2.
Versacool (70) -- Huang 28, Chua 16, Odullo 12, Sy 7, Veloso 3, Mercado 2, Tolentino

Ikaduhang duwa:

Landview (81) -- Lao 23, D. Hing 18, Go 14, Ang 10, Gollon 8, Tan 4, M. Hing 2, Sy 2
Dencraft (63) -- P. Sta. Maria 23, Noel 20, Jayme 14, Yu 4, Seno 2