Padayong gihuptan ni Anthony ‘The Man’ Mundine ang korona sa World Boxing Association (WBA) super middleweight pinaagi sa pagpukan ni Sam Soliman sa unanimous points decision kagahapon didto sa Melbourne.
Tulo ka hurado ang mi-iskor og 116-112, 116-112, 117-112 alang sa ikaupat nga title defense ni Mundine.
Ang 32-anyos nga si Mundine nagbitbit na og 32-3 win-loss diin 23 sa iyang mga biktima pinaagi sa knockout.
Ikatulo na sab kini nga higayon ni Mundine pagpukan ni Soliman. Iyang gipilde si Soliman pinaagi sa KO sa ikasiyam nga hugna didto sa Sydney niadtong Marso sa miaging tuig ug gipilde sab niya kini sa split decision didto sa Wollongong, Australia niadtong 2001.
Sa iyang bahin, si Soliman nga wala makabawos ni Mundine nagtangag og 35-11 win-loss record. (Yoyo R. Abayan)