Ang Mandaue Jaycees milansang sa ilang ikaduhang daog sa nagpadayong Jaycees Basketball Association (JBA) President’s Cup human ilang gipatilaw og unang kapildihan ang RC Goldline-Alcatel sa iskor nga 60-48 niadtong Domingo didto sa City Sports Club sa Ayala.
Sa laing duwa, midaog sab ang Versacool batok Landview sa iskor nga 66-64.
Sila si Nestor Patindol ug Ritchie Garcia maoy bida sa Mandaue JCI pinaagi sa pagbuak sa sikit nga duwa ngadto na sa ilang pagdominar gikan sa pagsugod sa fourth quarter diin sila nilabaw og 12 puntos, 43-31 ug wala na gyud manumbaling pa sa ilang kontra.
Si Patindol mitapos og 16 puntos ug si Garcia adunay 15 puntos alang sa Mandaue JCI nga adunay 2-0.
Ang undermanned nga RC Goldline gipangulohan ni Dennis Que sa iyang 18 puntos, si Dave Lim mitampo og 17 puntos.
Sa laing duwa, nabalikan na sab sa iyang maayong pulso si Edmund Odullo aron pangulohan ang Versacool pinaagi sa iyang 22 puntos. Gitabangan sab siya nilang Jeremy Huang ug Benedict Chua kinsa nagkumboya og 25 puntos
Si Mark Hing nga adunay 17 puntos maoy nangulo sa Landview. (Gabby G. Malagar)