Getaruelas hanas sab sa kayaking

Giprobahan ni road running queen Leizl Lumindas-Getaruelas nga dili lang siya hanas sa dagan kondili lakip na usab sa kayaking human gilangkat ang women’s singles title sa 300-meter sprint race sa Bugsay 2008 Kayaking Festival didto sa South Coastal Road (SRP).

Bag-o pang misakmit og titulo sa Cebu Queen City Footrace niadtong Domingo, si Getaruelas sa Team Holiday Spa mipukan ni Theodedys Camiguing sa Team IMS ug Joy Dehillas sa Team Val 2020 sa Naga City, kinsa mi-okupar sa ikaduha ug ikatulo nga dapit.

Sa men’s division, si  Arnel Gabutero sa Team Davao maoy naghari human gilupig ang iyang kauban nga si Paulo Dino Ouano diin si Buzzy Budlong sa Zugbugsay maoy mitugpa sa ikatulo.

Midaog sab og laing titulo si Gabutero dihang siya ug ang iyang kaabay nga si Ouano maoy nanghawod sa men’s doubles. 

Sa laing bahin, sila si Jedah Capada ug JR Tapdasan sa Team Val 2020 maoy naghari sa mixed tandem category. Sila si Getaruelas ug Charlito Esparar nalandig sa ikaduha, samtang sila si Ouano ug Melody Redillas sa Team Habagat maoy ikatulo.

Ang Bugsay 2008 gipasiugdahan sa Cebu Kayaking Club aron pag-promote sa paddle sports sa Pilipinas.