Ang mga free throws nilang Minoy Villaruel ug Vicente Armando Brigoli ug ang solidong depensa maoy gihimong hinagiban sa iComm International pagpukan sa Western Wats, 53-48 sa nagpadayong Inter-call center basketball tournament niadtong Sabado didto sa City Sports Club-Cebu (CSCC) sa Cebu Business Park.
Si Villaruel, ang team captain sa iComm International mipasulod sa iyang duha ka free throws aron pagbuak sa panagtabla, 48-all ug dayon si Brigoli mitusak og tulo sa iyang upat nga maoy mikandado sa kadaugan.
Sa ikaduhang sunod-sunod nga kadaugan, ang iComm ni coach Armando Colina mipatuman og solidong depensa aron pugngan ang paghasmag sa Western Wats.
Ang iComm mipahungaw sa ilang kainit pagsugod sa duwa sa pagtambayayong nilang Brigoli, Padernal ug Villaruel aron hatagan ang ilang koponan og sayes puntos nga labaw sa first quarter, 14-8. Sa tabang nilang Canada ug Marquez, miburot ang labaw sa iComm ngadto na sa nuybe puntos, 26-17 paghuman sa first half.
Hinuon, nakabangon ang Western Wats sa third quarter ubos sa paningkamot nilang Rivera, Tomakin, Alonzo ug Blanco. Ang Western Wats milupig sa pinuntosay sa iComm, 17-13 hinungdan nga mihiyos ang labaw, 13-39 paghuman sa maong kuwarter.
Nakaginhawa og maayo ang Western Wats dihang nangasipyat ang fastbreak lay-ups sa iComm. Sa gihapon, sa giya ni Rivera, ang Western Wats nakasikit sa duwa, 44-45 ug miilog sa labaw sa labing unang higayon sa iskor nga 46-45 sa kapin sa dos minutos sa duwa. Apan dali kining nabugto tungod sa solidong depensa sa iComm.
Dobleng selebrasyon ang naangkon sa iComm human ang ilang mga players nga sila si Bart Buenaventura ug Orven Enoveso midaog sa 2-Ball Shootout atol sa Inter-Call Center All-Star Saturday didto gihapon sa City Sports gym.
Sila si Buenaventura ug Enoveso mipukan nilang Flore ug Paraguya sa Calltek sa final, 31-30.
Laing individual winners atol sa All-Star Saturday mao sila si Villahermosa sa Teletech (3-pt. shootout) ug Lauro sa Western Wats 1 (free throw shooting).
Sa All-Star game, ang Group I milubong sa Group 2, 75-55 luyo sa talagsaong performance ni Franco Cipriano sa eTelecare, nga adunay 11 puntos uban ang 11 ka rebounds, tulo ka blocks ug usa ka steal.
Ang tim-os nga duwa ni Cipriano nagtuboy kaniya isip All-Star MVP.
PUNTOS MATAG USA
iCOMM (53) -- Padernal 15, Brigoli 13, Villaruel 10, Marquez 6, Canada 5, Bueventura 2, Godoy 2
WESTERN WATS (48) -- Rivera 14, Alonzo 9, Tomakin 7, Blanco 6, Poquita 4, Alinson 2, Campaña 1.