ACT mipukan sa SWU

Ang Asian College of Technology (ACT) Cyber Knights miposte og labing dakung upset sa 1st M. Lhuillier Kwarta Padala Summer Basketball Challenge dihang ilang gipanitan ang reigning National Students Basketball Championships titlist Southwestern University (SWU) Cobras, 92-88 sa miaging adlaw didto sa Cebu Coliseum.

Ang maong kadaugan nagpamatuod nga ang Cyber Knights seryoso sa ilang kampanya bisan og usa sila sa mga huyang nga team sa maong torneyo.

Gikontrolar sa Cyber Knights ang tibuok duwa diin ang sayes puntos nga labaw sa first half, 43-37 mitubo pa ngadto sa 12 puntos, 64-54 paingon sa final quarter.

Ang Cobras miaksiyon og kitkit sa labaw, 34-26, apan ulahi na ang tanan gumikan kay gawas nga nakapundo og dakung bentaha ang Cyber Knights, nahurot na sab ang oras sa ilang duwa.

Sa sayo pa, ang University of San Jose-Recoletos (USJ-R) Jaguars nakabawi human sa ilang kapildihan dihang ilang gipahimungtan  ang Don Bosco College (DBC) Greywolves, 98-79.