Delposo, Getaruelas midominar sa Ilocanos & Friends Fun Run

Sila si Eugene Delposo ug Leizl Lumindas-Getaruelas nidominar sa ilang tagsa-tagsa ka dibisyon sa 10-K Ilocanos and Friends Fun Run kagahapon didto sa Cebu Provincial Capitol ground.

Si Delposo, ang pambato sa University of Southern Philippines Foundation (USPF) mibulhot dayon  gikan sa  starting  line  aron  pag-abante sa  sayong  bahin sa karera ug mitamak kini sa finish line sa oras 34:29.12.

Mipahiluna sa ikaduha nga dapit si Mendel Lopez sa iyang 34:43.15, samtang ang igsuon ni Delposo nga si Joel maoy miangkon sa ikatulo nga dapit nga mi-oras og 35:26.32.

Sa pikas bahin, si Getaruelas mao sab ang nanghawod sa women's division dihang iyang gibiyaan silang Mary Beboso ug Madelyn Carter, kinsa mipahiluna sa ikaduha ug ikatulo nga dapit.

Sila si Delposo ug Getaruelas parehong nakadawat og P3,000 ug plake sa maong kadaugan.

Sila si John Philip Dueñas ug Honeylyn Jubay, maoy nanghawod  sa men ug women's 5K open  divisions.

Nalabwan ni Dueñas ang  kakusog nilang Riez Enriquez ug Gabriel Zabate, kinsa miangkon sa ikaduha ug ikatulo nga dapit.

Samtang si Jubay milupig nilang Merlita Arias ug Pearl Beronia.

Nanghawod sab si Hidelito Ngujo sa 5K MEPZ men's  division, samtang si Glady Sumile maoy nanghawod sa 5K MEPZ women's division.

Ang 10K executive gidominar ni Garry Garcia human niya gipilde silang Vincente Lamparas ug Nogie Biagan.

Lain pang  midaog  mao sila si Tomas Nuñez Jr., kinsa maoy nanghawod sa 10K Masters A. Gisundan nilang Jesse Mesa ug Alex Loloy alang sa ikaduha ug ikatulo nga dapit.

Miangkon sa nag-unang tulo ka luna sa 10K Masters B mao sila si Ruth Banzon, Adolfo Camello Jr. ug Eddie Sultan.

Sila si Charles Dave Beboso ug Haziel Retavale maoy nanghawod sa 3K boys and girls divisions.

Si Beboso gisundan nilang Prince Joey Lee ug Joel Andrin, kinsa mipahiluna sa ikaduha ug ikatulo nga dapit.

Nagsunod sab ni Retavale mao silang Clarisse Diongson ug Crizel Diongson.