Mga bilyaran sa Bohol

May nadiskobrehan kong dugang mga bilyaran sa nagkadaiyang kalungsoran sa lalawigan sa Bohol nga gidugok sa daghang mga magdudula. Akong nakita nga madasigon kaayo ang mga bilyarista sa maong dapit pagmanso sa ilang mga talento gumikan sa kalamposan nila ni Efren 'Bata' Reyes, Francisco 'Django' Bustamante, ug uban pa.

Adunay desenteng bilyaran nga nahimutang sa Ubay Public Market sa lungsod sa Ubay, Bohol. Nahimutang ang maong bilyaran sa ikaduhang andana sa merkado. Maingon ta nga luho ang maong bilyaran. Daghan ang mga bilyarista nga magyampungad sa maong bilyaran matag adlaw. Mga batan-on ug mga edaran na ang akong nakita nga nagdula sa maong billiard hall.

Aduna sad ning bilyaran nga akong nakita sa La Union, Candijay, Bohol nga gidugok sa daghang mga magdudula. Bisan og layo sa eskuylahan ang nahimutang sa maong bilyaran apan hugtanong gidid-an sa tag-iya niini ang mga estudyante sa pagdula og bilyar panahon sa tingklase. Dili gusto ang tag-iya ug tagdumala sa maong bilyaran nga madaot ang kaugmaon sa mga estudyante tungod lang sa pagdula og bilyar. Maayo.

Wala sab magpapiri ang mga magdudula sa lungsod sa Valencia. Gawas sa mga bilyarista nga kanunay magdulaan sa bilyaran sa barangay Badiang sa lungsod sa Valencia, mas daghan ang mga magdudula nga nagyampungad sa bilyaran nga nahimutang gyud mismo sa kinapusoran sa lungsod sa Valencia.

Mao usab ang mga bilyarista sa Basdio, Guindulman, Bohol. Nagpakita sila'g kadasig mao nga mainiton kanunay ang panagsangka nila sa bilyaran nga nahimutang sa maong lugar. Adunay labing menos tulo ka bilyaran nga nag-exist karon sa barangay Basdio nga gidugok sa mga bilyarista. Ang ubang mga bilyarista naggikan sa laing dapit nga manulong og dula sa barangay Basdio.

May kinabuhi usab ang dulang bilyar sa Virgen, Anda, Bohol. Mao usab sa Minol, Mabini, Bohol. Maayo ang dagan sa negosyong bilyaran niining duha ka dapit nga akong gipanghinganlan. Popular na kaayo ang billiard sport sa Bohol. Tungod niini, nakita nato nga nagpadayon ang paglambo sa billiard sport, dili lang sa Bohol kondili sa tibuok nasud nga Pilipinhon.

* * *

(Mga sugyot ug pakisayod? Text sa 0910-8105522)