Seryoso na ang Giants

Matapos mapigilan ng Purefoods Tender Juicy ang kanilang tatlong sunod na kamalasan mula na rin sa pagparada sa isang defense-oriented import, nakakangiti na ngayon si coach Ryan Gregorio.

“We have regained our confidence,” ani Gregorio matapos umiskor ang Purefoods ng isang 88-78 panalo kontra nagdedepensang Alaska Aces noong nakaraang linggo sa Calape, Bohol na tinampukan ng paglalaro ni 7-foot-1 Moroccan reinforcement Reda Rhamili. “He (Rhamili) answered our problems in rebounding and interior defense.”

Hangad ang kanilang ikalawang sunod na panalo, sasagupain ng Purefoods ang Magnolia ngayong alas-7:20 ng gabi matapos ang labanan ng CocaCola at Air21 sa alas-4:50 ng hapon sa classification phase ng   2008 PBA Fiesta Conference sa Araneta Coliseum.

Hawak ng Red Bull ang pangunguna mula sa  7-2 kartada kasunod ang Tigers (6-3), Talk ‘N Text (6-3), Sta. Lucia (5-3), Express (4-4), Beverage Masters (4-4), Giants (3-4), Welcoat (3-6), Aces (3-6) at Ginebra (1-7).

Sa naturang tagumpay laban sa Alaska, tumipa si Rhamili, produkto ng St. Mary’s Gaels sa US NCAA at isang many-time member ng Moroccan national team, ng 14 marka bilang kapalit ng top scorer na si Darius Rice.

Nagbuhat naman ang Beverage Masters ni Siot Tanquingcen sa isang 92-106 pagkatalo sa Tigers noong  Biyernes.

Sa unang laban, kapwa namang pipilitin ng Coke, nakalasap ng isang 91-99 kabiguan sa Alaska kamakalawa, at ng Air2, nakatikim ng 100-113 pagkatalo sa Sta. Lucia noong Linggo, na makabawi mula sa magkahiwalay nilang pagyukod. (Russell Cadayona)