FEU seniors, Ateneo juniors malapit na sa sweep

Isang panalo na lamang ang layo ng Far Eastern U para ma-sweep ang kanilang mga laban sa group stages, matapos ang magaang 80-47 panalo kontra sa San Beda-Alabang sa seniors division ng Nike Summer League basketball tournament nitong Martes sa Far Eastern U Gym.

Nagpakawala ang Tamaraws ng 32-7 third-quarter blitz at ‘di na nakarekober pa ang San Beda-Alabang para sa ikaanim na panalo ng Tams at isang panalo na lang para ma-sweep ang Group C,

Nasilat naman ang Letran sa FEATI 76-72.

Na-outscore ng FEATI ang pinapaborang Knights sa ikaapat na quarter, 28-21 upang itala ang upset sa Group D.

Ang FEATI, 10-0 sa fastbreak-points department at 15-4 sa points sa turnovers, ay umangat sa 4-2 habang bumagsak naman ang Letran sa 3-2.

Sa juniors action kahapon, naiposte ng Ateneo ang ikalimang sunod na tagumpay matapos ang magaang panalo sa Don Bosco-Makati 93-42.

Inilampaso naman ng San Beda ang Informatics 83-69.

Samantala, tangka ng De La Salle ang win no.4 sa pakikipagharap sa Adamson sa FEU Gym sa alas-2:30 ng hapon.

Ang La Salle ay may 3-0 at ang Adamson ay 4-1 sa Group A sa likod ng walang larong Mapua 5-0.