Gorres, Tuñacao pulos mag-atubang og krusyal nga away

Parehong magsagubang og mahinungdanong away ang duha ka produkto sa ALA Boxing Games nga sila si Z 'The Dream' Gorres ug Malcolm 'Eagle Eye' Tuñacao batok sa   ilang tagsa-tagsa ka kaatbang gikan sa Africa.

Ang maong away maoy mosukod kun angayan pa ba sila hatagan og laing higayon aron maka-away og world title.

"We believe he can still be a world champion," matud pa ni ALA Promotions president Michael P. Aldeguer kabahin ni Gorres atol sa pormal nga paglusad sa "One More Time" card kagahapon didto sa Big Mao-Crossroads.

Si Gorres (27-2-2, 15KOs), ang kasamtangang IBF Intercontinental super flyweight champion, makigharong ni Universal Boxing Organization (UBO) bantamweight titlist Nick Otieno (15-1, 5KOs) sa Kenya sa usa ka non-title bout sud sa 10 ka hugna nga maoy main event sa maong boxing promotion karong Mayo 31 diha sa Pacific Grand Ballroom sa Waterfront-Cebu City Hotel.

Kun buligan og maayong palad, si Gorres maka-angkon og katungod nga mohagit  sa modaog sa IBF super flyweight title match tali ni defending champion Dimitri Kirilov sa Russia ug Vic Darchinyan sa Australia sa dili pa matapos ang tuig.

Sa supporting main event, si Tuñacao (21-2-3, 14KOs) mokatkat og balik sa ring human sa 16 ka bulan nga pahuway diin kini gikatakda nga makigbinukbukay ni Tanzanian champion Rashid Ally (11-9-7, 2KOs).

Si Tuñacao wala na maka-away pa sukad mapilde pinaagi sa 10th round technical decision sa Pinoy ra sab nga si Rolly Lunas niadtong Enero 13 didto sa Tokyo, apan si Aldeguer masaligon gihapon kaayo nga sanag pa ang ugma nga nagpaabot sa kanhi WBC flyweight champion.

"Wala pa koy idea kun unsay iyang istilo pero nag-training ko og maayo kay kahibawo ko unsa ka-importante kining awaya para nako," matud pa ni Gorres. "Dili ko kasulti kun unsa nga round nako siya ma-knockout.

Paningkamotan lang nako nga sayo mahuman ang among away."

Gawas nilang Gorres ug Tuñacao, angayan sab nga saksihan si Jason Pagara, ang bag-ong kaplag sa ALA Boxing Gym nga lumad gikan sa dakbayan sa Cagayan de Oro.

Ang 16-anyos nga si Pagara (13-1, 7KOs) naglaraw nga mokulit og kasaysayan isip labing bata nga kampiyon sa ALA Stable gumikan kay makigharong man siya ni Indonesian hard-puncher Heri Andriyanto (11-3-1, 7KOs) alang sa WBO Youth lightweight title.

Sa laing bahin, ang mga tiket sa "One More Time" mapalit na sugod karong adlawa sa nagkalain-laing outlets nga naglakip sa ALA Gym-BTC, Islands Souvenirs ug Bisiya Ispisyal boutiques sa SM ug Ayala ug ingon man sa ALA main office pinaagi ni Brent sa telepono 346-3489 o 0917-3253005.

Ang mga tiket nagkantidad og P1,500 sa VIP 1st row, P1,250 sa VIP 2nd row, P1,000 sa 3rd row, P750 sa 4th row, P550 sa ringside, P350 sa ballroom ug P250 sa balcony.