SWU Alumni Day himuon karon

Agi’g pagsaulog sa ilang Alumni Day, ang Southwestern University (SWU) mopahigayon  og exhibition games sa volleyball ug basketball events nga giulohan og "Cobra Challenge 2008" karong adlawa diha sa Aznar Coliseum.

Gubat kini  tali sa mga  banggiitang magduduwa kaniadto ug sa mga batan-ong volleyball varsity players.

Human sa volleyball, isunod ang aksiyon sa basketbol diin mag-abot sab ang dalan sa mga tang-ang ex-Cobras nga nakahatag og dakung dungog sa natad sa basketball sa milabay’ng katuigan.
Ang SWU volleyball alumni kinsa mopakita sa ilang abilidad  mao sila si Thelma Barina Rojas, Grace Antigua, Zenaida Ybañez Echavez, Aillen Ybañez Suson, Yolanda Pil Rizarri, Rosemary Molit Prochina, Chandrina Mahilum Tumabang, Joy Bardago Padilla, Joreen Sanchez, Jackielou Jimenez ug Janeth Ponte.

Ang bag-ong gikoronahang Nestea Beach Volley champion nga sila si Florian Gutierrez ug Janelle Tabio dili makapakita'g aksiyon kay nanikaysikay kini sa 1st San Remigio Beach Volley Open didto sa San Remigio, Cebu.

Apan ang gikahinaman  sa kadaghanan mao ang pagtunob sa korte sa mga kanhi inilang sakop sa SWU Cobras nga moduwa ubos sa White ug Blue teams. 

Naglangkob sa White Team mao silang Paul Maninang, Nonoy Gonzaga, Mario Naron, Calvin Tuadles, Rey Potot, Maynard Padilla, Arnold Ciabo, Dilbert Ompad, Roel Natividad, George Aznar, Alvin Plaudin, Fermin Baure, Danilo Aying, Eric Espinosa, Mark Anthony Tallo ug Danilo Genrdauli.

Moduwa sa Blue Team mao sila si Cesar Ortega, Edwin Kitane, Eddie Espinosa, John Flores, Arnold Contorno, Lamberto Lawas, Bong Begontes, Ahmed Lozano, Rey Eduave, Bebot Ompad, Elmer dela Cruz, Joel Rosales, Jerome Acebron, Edgar Dionson ug Roy Galon.
Ipaila sab karong adlawa ang SWU Cobras kinsa bag-o lang niduwa og duha ka exhibition games didto sa  Xiamen City sa China.

Ang ilang pagduwa didto sa China sukli sa ilang paglangkat sa kampiyonato sa 62nd National Basketball Championships (NSBC) batok sa University of the Visayas (UV) Green Lancers  niadtong Marso 1 diha sa Cebu Coliseum.
Ang SWU Cobras mitapos sa ikaduhang puwesto sa Visayas Amateur Athletics Association (VAAA) batok sa UV Lancers niadtong Abril 27 diha gihapon sa Cebu Coliseum.
Ang kalihukan karong adlawa  pangulohan sa ilang Alumni president nga si Atty. Climaco S. Camiso, Pierre Infante sa SWU Alumni Foundation, Inc. ug Ryan P. Aznar.