MO-CV mopahigayon og Cebu Queen City 10-K run karong Mayo 25

Ang Marathon Organizers of Central Visayas uban sa pagbulig sa Department of Tourism ug Philippine Sports Commission mopahigayon na sab og lumba sa dagan nga ulohan og “Cebu Queen City Footrace” nga mosikad karong Mayo 25.

Sugdan ang  lumba sa alas-5:00 sa buntag ug anha kini manukad sa atubangan sa Magellan Cross ug mo-agi sa mga dagkung kadalanan ug tourist landmarks ug dayong balik sa finish line sa Cebu City Hall.

Liboan ka footracers professionals, executives, armed forces, students, government officials, running enthusiasts ug visiting tourists ang gilaumang mosalmot ning 10 ka kilometrong lumba sa dagan.

Tigian sa maong lumba mao ang Tourist division (men’s and women’s), Executive-A, Executive-B (CERC division), Executive-C (non-member division), PNP division (men’s and women’s), AFP division --PA, PN, PAF (men’s and women’s),  MEPZ division (men’s and women’s), Open division (men’s and women’s), Masters-A (40-49 yrs.), Masters-B (50-59 yrs.), Masters-C (60-yrs. above) ug Tri-media division (men’s and women’s).

Ganting salapi, tropeyo, medalya ang madawat sa mga mananaog. Hatagan sab og award ang labing bata nga winner ug ingon man ang kinadaghanan nga delegasyon.

Ang registration gisugdan na  ug kutob lamang kini karong Mayo 22 diha sa Philippine Sports Commission-RO7, Cebu City Sports Center ug sa Rudy Project  sa SM City-Cebu. Ang registration fee nagkantidad og P175.00 libre na ang singlet, certificate ug gift items.

Sa laing bahin, si race director Joe Deresas nagkanayon nga adunay route familiarization kon pagsinati sa rota nga pagahimuon karong Mayo 24 sa alas-6:00 sa buntag.