Aguilar, Ornopia, Bustillo mihakot duha ka korona

Dobleng kadaugan ang naangkon ni Glenn ‘D King’ Aguilar  human gipangpukan ang iyang mga kaatbang sa fifth leg sa 2008 MS Motosuit Motocross Series nga giulohan og “Erwin Agustino Motocross Cup” niadtong Domingo didto sa Ayungon, Oriental Negros.

Mao kini ang unang higayon ni Aguilar nga misalmot og duha ka kategoriya sa maong series. Moapil lamang siya og lumba sa special pro class. Ning higayona si Aguilar misuway og kumbati sa expert ug ang MS Motosuit image model wala pabangbang aron paglangkat sa korona.

Si Irwin Uypitching  mipahiluna sa ikaduha sa duha gihapon ka kategoriya gikan sa iyang temporaryo nga pagretiro tungod sa injury, gisundan ni Wensor Famorca kinsa mi-okupar sa ikatulong dapit.

Mihakot sab og duha ka titulo sila si Seigfred Ornopia sa Keiz BJ Motorsales and Services ug Bonnie Bustillo sa Castrol-Quickflight.

Gidominar ni Ornopia ang executive A ug B, samtang si Bustillo mao sab ang mipatigbabaw  sa local enduro ug novice enduro.

Si Ornopia mipukan ni Ramie Quitay sa ilang kumbati sa executive A, samtang si Jun Enriquez nalandig sa ikatulo. Siya sab ang nanghawod batok nilang Gener Sicad ug Quitay sa executive B.

Nagsunod ni Bustillo sa novice enduro mao sila si Elton See ug Andrew Du, samtang sa local enduro mao sila si Butch Flores ug Eljun Aldecoa.

Bisan napalpak pagdaog og titulo sa experts ug pro classes, si  Famorca mihakot gihapon og dungog human maghari sa intermediate division. Si Clark Wagas mitapos sa ikaduha, gisundan ni  Weng Yapparcon.

Si Wagas sa Castrol-Quickflight misakiyo sa novice production title human gipilde silang Rex Barbaso ug Christopher Voss, samtang si Voss maoy  milangkat sa titulo sa beginners production human sab niya gipilde silang John Flores ug Adam Uypitching.

Si Clark Wagas, ang amahan ni Manuel mao sab ang naghari sa executive C batok nilang Felipe Montejo ug Gener Sicad, samtang si Jojo Enriquez wala sab magpabitin sa mini class.