Atan Guardo 4-0 na sa seniors division sa Sambag I Summer Sports League '08

Nagpabilin pa gihapong namupo sa ilang kadaugan ang Atan Guardo sa nagpadayong   2008 Sambag I Summer Sports League basketball event sa seniors division human nila gipukan ang SMAA sa  iskor  nga 88-77 sa ilang mainitong panagtigi niadtong Martes sa gabii didto sa Sambag I Sports Complex.

Ang Atan Guardo   nagtangag na karon og limpiyong 4-0 win-loss record.

Sa unang kuwarter, sikit kaayo ang  iskor diin milabaw lang ang SMAA og uno punto batok sa Atan Guardo ug ila pa kining nainat ang labaw ngadto na sa kuwatro puntos sa iskor nga 45-41 paghuman sa first half.

Apan ang Atan Guardo nakabangon sa ikatulong kuwarter human kini mipauwan og mga puntos aron pag-ilog sa labaw sa iskor nga  63-61. Gikan niadto wala na molingi pa ang Atan

Guardo nga nagpabiling walay pilde sud sa upat ka duwa. Ang summer league gipasiugdahan sa Sambag I Barangay Council  ubos sa liderato ni  Brgy. Capt. Jerry Guardo uban sa pag-abag ni Atan Guardo sa Uniherb Philippines, usa sa mga nag-unang tig-apod-apod og food supplements sama sa Arthro Kontra Arthritis, Kidneycare, Heartvit ug Diabet.

Puntos matag usa

ATAN GUARDO (86) --Ipong 22, Tallo 20, Cabrera 11, Doroliat 10, Limana 9, Bolo 8, Tampos 6 SMAA (77) -- Edoy Fernandez 21, Magalang 19, Pogoy 8, Yao 8, Balbuena 7, Sayat 7, Acedillo 4, Lastimosa 3