Gipakita ni David Lim ang iyang katakus sa natad sa drag race aron angkonon ang prestihiyosong Quick 8 run title sa 1st Mandaue Festival Run Invitational Drag Race niadtong miaging adlaw didto sa Mandaue City reclamation area.
Si Lim sa DGL Motosports mimaneho sa iyang Honda Civic EG chopped-top ug Mitsubishi Lancer Evolution 8 sa oras nga 6.8 ug 6.5 segundos aron pagposte og best times sa maong lumba.
Mao kini ang ikaunom nga overall title ni Lim sud lang niining tuiga.
Sa wala pa siya moapil sa Mandaue festival run, mipupo kini og pito ka tropeyo sa miaging semana sa Autocross Challenge didto sa Clark Expo sa Pampanga.
Si Tsuntsun Mendoza sa ACR team mipahiluna sa ikaduhang dapit sa maong kategoriya.
Si Warren Go sa ACR maoy midaog sa Class A title uban ni Tsuntsun Mendoza nga iyang runner-up.
Sa Class B, si Robert Pangilinan sa DSM maoy naghari batok ni Dino Tormis sa ACR, samtang si Earl Dotillos mao sab ang misakmit sa titulo sa Class C human gipilde si Patrick Mendoza.
Sa Superbike 1000ccc category, si Andrei Ursal maoy naghari, samtang si Ryan Mendoza mao mipahiluna sa ikaduhang dapit.
Si Michole Ursal mao sab ang mipatigbabaw sa Ducati 999.66 category.