3-on-3 Big Al's basketball challenge ipahigayon sa Visayas ug Mindanao

Lain  na sab nga sporting event ang paluyohan  sa DURABEND ug ning higayona mao ang 3-on-3 Big Al’s Basketball Challenge nga gikatakdang sugdan karong Mayo 18 sa Ormoc Superdome.

Matud pa ni sports patron Alan G. Choachuy, ang utok sa maong kalihukan nga ang maong event adunay tulo ka legs, duha sa Visayas ug usa sa Mindanao.

Ang Cebu leg  tentatibong gitakda sa Mayo 24 ug 25 sa North Atrium Mall sa Mandaue City,  samtang ang third leg himuon gikan sa Mayo 31 ug Hunyo 1 sa Lim Ket Kai sa Cagayan de Oro City.

Ang Ormoc, Cebu ug Cagayan maoy napilian nga mga binyu kay mao man  himalitan kaayo og DURABEND Pipes.

Ang torneyo adunay duha ka age-bracket, ang 17-under ug 14-under.

Ang 17-under bukas niadtong natawo sa Mayo 1, 1991, samtang ang 14-under niadtong natawo sa Mayo 1, 1994 o mas bata pa.

Bukas kini sa tanang varsity players. Ang matag team adunay labing daghan upat ka magduduwa.

Ang tanang mo-abante sa semifinal round hatagan og jersey.

Ganting salapi ug tropeyo ang ihatag ngadto sa nag-unang  mga teams nga gipasiugdahan ni Big Al’s Production nga gipangulohan ni Architect Alan Choachuy ug kanhi PBA player Mark Tallo. Adunay special awards ihatag alang sa MVP.

Ang entry fee nagkantidad og P500 matag team.

Alang sa registration ug dugang pang mga kasayoran,  kontaka lang si Dodong Alesna sa 256-2059 o dili ba ni Dolly sa 0910-5576443.