Largo abante sa second round sa Cebuana Lhuillier tennis championships

Ang misulbong nga si Francis Largo maoy unang iladong tennis player nga mi-abante na sa second round sa Cebuana Lhuillier Men’s Open Tennis Championships kagahapon  didto sa Baseline Sports and Recreation tennis courts.

Si Largo kinsa miduwa nga wala magsul-ob og medyas mipukan  ni  Jandrik  de Castro, 6-3, 6-2.

Si Largo, ang Palarong Pambansa gold medalist  naghuna-huna  nga dili  na sab mosul-ob  og  medyas sa iyang pakigharong ni seeded no. 8 Ralph Kevin Barte karong adlawa.

Si Barte maoy responsable pagpalagpot sa laing Sugbuanong si Michael Quiñones pinaagi sa 6-1, 6-0 nga kadaugan.

Si Kennex Abadia, ang ikatulong iladong Sugbuanong tennis player, napalagpot sab human mapilde ni Pablo Olivarez III sud sa tulo ka sets, 6-4, 4-6, 6-2 sa ilang hugtanong away nga milungtad og tulo ka oras.

Sa laing bahin, ang topseed sa maong torneyo nga si Johnny Arcilla midemolis ni Antonio Sagansay, 6-3, 6-3. Sunod kontrahon ni Arcilla mao si Ronald Joven, kinsa miabante human miposte og 6-2, 2-6, 6-4 nga kadaugan batok ni Gilbert  Estrada.

Ang seeded no. 4 nga si Yannick Guba mihatag og leksiyon ni Niño Alcantara human gilubong, 6-1, 6-1, samtang si Jessie Lapore mipalayas ni Joseph Arcilla, 7-5, 6-2. Ang seeded no. 5 nga si Elbert Anasta midaog sab pinaagi sa pagpukan ni Leander Lazaro, 6-3, 6-2.

Sa laing bahin, ang doubles event mosikad karong hapon dungan sa second round sa singles event.

Ang labing gipaabot sa mga aksiyon karong adlawa mao ang top doubles player sa nasud nga si Jun Toledo kinsa makigpares ni event backer Jean Henri Lhuillier. Ilang harungon sila si Lapore ug Randy Villanueva.