Hero Commando gibirahan sa DJD Eng'g.

Gibirahan sa DJD Eng’g. ang Hero Commando Pistol pinaagi sa pag-iskor og 83-72 nga kadaugan niadtong Martes sa nagpadayong Power Forty President’s Cup 2008 Summer League didto sa Inayawan Sports Complex.

Sila si Carding Vernaiz ug Wilbor Cabrera pulos mikulit og 20 puntos aron tunolan ang DJD Eng'g sa ilang ikatulong kadaugan sa lima ka duwa.

Si Jojo Ibones maoy nangu sa mibahar nga Hero Commando kinsa nahimutang karon sa kinailawmang bahin sa liderato sa ilang 1-5 nga baraha.

Sa unang duwa, wala kapugngi ang pagmangtas ni Michael Arias kinsa mipabuto og 28 puntos aron pangulohan ang Amihan Bag ngadto sa kadaugan batok sa UTASSCO Utility sa iskor nga 76-72.

Si Melvin Layon mitampo og 17 puntos ug si Domie Ozon miamot og 12 puntos alang sa maong kadaugan.
Ang UTASSCO gipangulohan ni Alex Mercado sa iyang 19 puntos, samtang si Atty. Flor Yosores, ang tag-iya sa team mitampo og 15 puntos.

Puntos Matag Usa

Unang duwa:

Amihan (76) -- Arias 28, Layon 17, Ozon 12, Rama 7, Echavez 6, Yosores 4, Colinares 2

UTASSCO (72) -- Mercado 19, Yosores 15, Reyes 10, Lisondra 8, Yu 6, Nacional 6, Moniva 4, Labajo 2, Filisopo 2

Ikaduhang duwa:

DJD Eng’g. (83) -- Vernaiz 20, Cabrera 20, Gerali 12, Abasolo 11, Balbanera 10, Nuñez 10

Hero Commando (72) -- Ibones 17, Cabañero 15, Rosal 11, Javierto 10, Genzon 10, Lalican 6, Nacional 6