Yap hari sa Rose Pharmacy Chess Open

Ang mga Sugbuanong chess players nga si Kim Steven Yap nakatabla uban ni NM Rogelio Enriquez sa ikapito ug katapusang hugna, apan bisan pa niana siya maoy giilang hari sa Rose Pharmacy Chess King Open dili pa dugay didto sa SM City-Cebu Entertainment Plaza.

Gitapos ni Yap ang duha ka adlaw nga kompetisyon bitbit ang 6.5 puntos.

Si Enriquez nagtabla uban nilang Eden Diano, Richard Natividad ug Allan Salientes sa managsamang 6.0 puntos, apan siya maoy miangkon sa ikaduhang dapit tungod kay daku siya’g nakuha sa tie-breaker output nga 31.5 puntos.

Si Diano mi-okupar sa ikatulo sa iyang 27.5 puntos, gisundan ni Natividad nga adunay 27.0 puntos ug Salientes nga nakakuha og 25.0 puntos.

Mikompleto sa top-16 finishers mao sila si Francisco Abugho, James Uy, Mark Mangubat, Miguel Banibane, Ceferino Vizco, Adonis Buenaventura, Leo  Cortes, Delfin Yano, Joe Atillo, Hector Villamora ug Richie Evardo.

Sa CEPCA Kiddies Tournament nga kabahin sab sa 2008 Cebu Summer Chess Extravaganza,  sila si Daniel Lorenzo Miñoza ug Francis Balbona pulos mitapos sa ilang kampanya pinaagi sa pagposte og 4.5 puntos.

Apan bisan pa niana, si Miñoza maoy misakmit sa championship trophy tungod sa iyang taas nga tie-breaker. Nakakuha siya og 17.0 puntos, samtang si Balbona miposte og 15.5 puntos.

Gipukan ni Miñoza si Harold Pones sa katapusang round human sa 40 ka duso sa ilang Sicilian game, samtang si Balbona mipanton ni Raffy Bensi sud sa 36 ka duso.

Mipahiluna sa ikatulo hangtod sa ikawalo mao sila si John Paler, Aldrin Barade, Harold Pones, Raymond Abellana, Detlef Luga ug Cheryl Angot.

Sa juniors division, si Shawn Patrick Osorno mipuhal ni Kyle Sevillano sud sa 30 ka duso sa French game sa final round aron paglangkat sa kampiyonato sa iyang perfect score nga 5.0 puntos.

Si Ma. Theresa Letegio midispatsar ni Justin Misa human sa 32 ka duso pinaagi sa Rudy Lopez opening aron pagpahiluna sa ikaduhang dapit sa iyang 4.0 puntos.

Mipatong sa ikatulo hangtod sa ikaunom nga dapit nga nakakuha og 3.5 puntos matag usa mao sila si Kyle Sevillano, Joroni Vinculado, Niño Avelino Bautista ug Marife Serentas.

Sa laing bahin, si Jerry San Pascual maoy nanghawod sa April edition sa CEPCA Monthly Handicapping. Si Felix Puloyapoy mitapos sa ikaduha, gisundan ni Mer Fernandez.