Sa dili pa magsinukliay og kumo ibabaw sa ring, ang mga bida sa gipaabot nga “Back on Track” boxing promotion karong Sabado diha sa Cebu Coliseum magbinayloay una og mga pulong sa usa ka press conference karong alas-11:00 sa buntag diha sa Hotel Fortuna.
Gilaumang motambong sa presscon mao sila si international promoter Sammy Gello-ani, IBF minimumweight champion Florante Condes ug sports patron Lorenzo ‘Chao’ Sy, ang tag-iya sa Hotel Fortuna.
Duha ka beteranong boksidor nga sila si Rodel ‘Batang Mandaue’ Mayol ug Bert ‘Ninja’ Batawang co-headline sa maong promosyon nga gipasiugdahan sa SGG Sports Promotions uban sa Viva Sports, Republic Chemicals, Tanduay ug Pioneer ElastoSeal.
Si Mayol (23-3, 18KOs) makigsunikliay og kumo batok ni Wisan Sor Suchanya (9-6-1) sa Thailand sa gikatakdang 10 ka hugna nga non-title fight, samtang si Batawang (51-7, 35KOs) makigharong ni Thai knockout artist Samransan Singmanassak (32-13-1, 26KOs) sa ilang 12 ka hugna nga bugno alang sa WBO Oriental light flyweight t championship.
Mao unya kini ang labing unang away ni Mayol dinhi sa Sugbu human sa unom ka tuig. Katapusan niyang away dihang iyang gipilde si Niño Suelo sa 12 ka hugna nilang kinumbati aron pagsakmit sa Philippine minimumweight championship niadtong Agosto 3, 2002 didto sa Mandaue City Cultural and Sports Complex.
Sa supporting bouts, si kanhi PBF flyweight champion Federico 'Magnifico' Catubay (20-14-3) sa SGG Stable moharong ni Brix Bomb Ray sa Tony Dacer Stable sa Davao, samtang si Pedro Malco sa Zamboanga City moharong sa way pildeng si Eric Macas (8-0, 5KOs) sa Bong Yap Stable.
Moladlad sa ilang abilidad sa preliminary bouts mao sila si Roemart Sentillas (3-0) batok Ed Earl Orellano (4-0-1), Roldan Castrodes (6-0) batok Jerome Buntog (1-3-1), Rodel Adelmita (4-0) batok Edzel Tuñacao (2-0-0), Ryan Tampus batok Jerome Aguirre ug Ariel Adan batok Arnel Dunal.
Ang mga tiket nagkantidad og P50 sa general admission, P100 sa upper box, P250 sa lower box ug P500 sa ringside.