Ang Genergex naghangad sa 35 puntos nga gipabuto ni Brian Gabasa aron paglumpag sa JV Shop N Shop sa iskor nga 71-60 sa pagsugod sa 2008 Winners League Basketball Tournament niadtong Domingo didto sa City Sports Club-Cebu gym sa Cebu Business Park.Nakabuylo ang Genergex pagsugod gyud sa duwa hinungdan nga nakabaton kini og nuybe puntos nga labaw paghuman sa unang kuwarter, 20-9. Apan ang kaatbang nga JV Shop N Shop mihinay-hinay og kitkit sa labaw ug miabot na lang og singko puntos ang labaw sa Genergex sa halftime, 33-28.
Sa paningkamot nilang Dexter So ug Vincent Sy nailog sa JV Shop N Shop ang dos puntos nga labaw, 50-48 pagsugod sa final quarter.
Apan mao didto ra taman ang maayong labok sa JV Shop N Shop kay si Gabasa mikiat man og balik nga maoy nangulo sa ilang 23-10 rally aron ihatod ang Genergex ngadto sa kadaugan.
Si PJ Iway mipabuto og 13 puntos alang sa Genergex, samtang si So mao lamang ang bugtong nakakuha og double figure sa JV Shop nga adunay 20 puntos.
PUNTOS MATAG USA
Genergex (71) - Gabasa 35, Iway 13, C. Lim 10, Aleta 9, Malixi 2, Gaw 2
JV Shop (60) - So 20, Sy 14, Hing 9, Ong 9, Go 8