Malingin, Bardonio mitunol bulawan sa CV

Mitigom na og 16 ka bulawan ang Central Visayas dihang sila si long jumper Stella Maris Malingin ug gymnast Jojielyn Tracy Bardonio nanghawod sa ilang tagsa-tagsa ka duwa sa ikaupat nga adlaw sa 2008 Palarong Pambansa kagahapon didto sa Ramon V. Mitra Jr. Sports Complex sa Puerto Princesa, Palawan.

Sa pagka karon, ang Central Visayas mikolekta na og 55 ka medalya nga gibahin-bahin ngadto sa 16 golds, 25 silvers ug 14 bronzes.

Halandumon kaayo ang unang pag-apil sa 12-anyos nga si Malingin sa Palaro kay naka-gold kini sa elementary long jump sa gilay-on nga 4.61 metros. Iya kining natala atol sa iyang ikatulo sa unom niya nga pagsuway.

Gumikan sa maong kadaugan, si Malingin gitanyagan dayon og scholarship gikan sa University of Southern Philippines Foundation (USPF).

Sa laing bahin, si Bardonio usa sab sa tinubdan sa kalipay sa Central Visayas. Siya maoy mitunol sa ika-16 nga bulawan alang sa Central Visayas pinaagi sa pagpanghawod sa ribbon apparatus. Iyang napuhalan ang early favorite nga si Carmelli  Garrovillo, kinsa nakamugna og daghang sayop sa nagkalain-laing apparatus. Si Garrovillo midaog lang og silver sa rope ug bronze sa bola.

Ang elementary girls squad sa Central Visayas naka-silver sa artistic individual all-around  kortesiya ni Noimi Soco.

Si Dharl Pitogo sa Central Visayas midaog sab og silver sa secondary 110m hurdles. Mi-oras siya og 15.9 segundos, duha lang ka segundos ang ligas sa gold medalist nga si Jose Unson sa National Capital Region (NCR).

Sama ni Pitogo, si Jee-Ann  Racoma pakyas sab pagkabkab og bulawan ug igo lang kini mitiltil og bronze sa secondary girls 100m run, samtang si Angeline Dales midaog og bronze sa elementary girls discus throw.