APIBC andam na

Andam na ang tanan alang sa pagpahigayon sa Asia Pacific International Bodybuilding Championships nga gikatakda karong Abril 25 sa alas-6:00 sa gabii diha sa Cebu Grand Convention Center (CGCC).

Ang pre-judging himuon karong  alas-3:00 sa hapon diha sa Tambuli Resorts East sa dakbayan sa Lapu-Lapu.

Adunay siyam ka kategoriya ang tigian sa maong kalihukan ug kini mao ang Masters, Juniors, Mr. Athletic, Ms. Fitness, Ms. Physique, Tall Class, Medium Class, Short Class ug Mixed Pairs.

Sa laing bahin, gipahigayon niadtong miaging adlaw ang hinashasay alang sa nasudnong koponan didto sa  Teatro Casino sa Waterfront Cebu City Hotel and Casino sa barangay Lahug, ning siyudad.

Ang nag-unang lima ka mananaog sa matag kategoriya maoy morepresentar sa nasud alang sa mga international nga kompetisyon.

Ang duha ka kompetisyon nga gipasiugdahan sa Workout Fitness Center nga adunay mga sangang buhatan sa Banilad, F. Ramos, Mandaue ug  Tabunok gihatagan og pagtugot gikan sa Samahan ng mga Barbelista ng Pilipinas ubos sa liderato ni Engr. Jun Tanyag ug sa NABBA International uban ni secretary-general Jim Pitt.

Mapalit ang mga tiket sa tag-P150 matag event. Aduna say dinner tickets nga ibaligya sa tag P500.

Alang sa dugang mga kasayoran, tawag sa 345-2395, 255-5531 ug 345-9998.