Central Visayas mikabkab 3 ka bulawan

Mihakot dayon og mga medalya ang special athletes sa Central Visayas pagsugod sa Palarong Pambansa kagahapon didto sa Ramon V. Mitra Jr. Sports Complex sa Puerto Princesa, Palawan.

Ang special athletes mikabkab og tulo ka golds, duha ka silvers ug duha sab ka bronzes sa special event

nga kabahin na sa Palaro, apan ang kinatibuk-ang resulta sa maong event dili i-apil sa kuwentada sa overall standings.

Si Kent Digor sa Mandaue midaog sa 15-under 100m dash sa mga mentally challenge athletes, samtang ang iyang teammates nga sila si Gia Gestopa ug Merasol Cutamora nakakuha og silver ug bronze medals sa habig sa babaye.

Sa 16-under division, sila si Ira Chariza Luarez ug Marlon Leyson maoy labing kusog sa track, samtang sila si Mariel Sherin Tan ug Mizzel Dawa maoy silver ug bronze medalists.

Sa regular event, ang Central Visayas napakyas pagkabkab og bulawan sa pagsikad sa track and field competition.

Sa volleyball, ang Central Visayas secondary girls squad miyukbo ngadto sa Central Luzon sa straight sets, 25-27, 25-30, apan ang ilang elementary counterpart midaog batok sa ARMM, 25-12, 25-11.

Ngil-ad sab nga tilimad-on ang naangkon sa Central Visayas  sa secondary basketball  kay napukan kini sa Ilocos region sa iskor nga 71-75.

Lain pang nadag-an sa Central Visayas mao ang duwang football sa elementary dihang ilang gisirohan ang Caraga, 3-0, miposte sab og  5-1 nga kadaugan batok sa Central Luzon sa secondary girls softball. Ang Central Visayas mipukan sab sa Region V,  5-1 ug Region VIII, 11-0 sa secondary boys fotball.

Sa laing bahin, si Miss CVIRAA Eva Psychee Patalinjug maoy gikoronahan isip “Miss Palarong Pambansa 2008.”