Gisugdan sa Convergys ang ilang kampanya alang sa makasaysayanon nga three-peat pinaagi sa paglubong sa Calltek sa iskor nga 62-30 sa 2008 Inter-Call Center Basketball Tournament didto sa City Sports Club-Cebu gym sa Cebu Business Park.
Nagmangtas dayon ang Convergys gikan sa pagsugod hangtod pagtapos sa duwa ug ilang gitapos ang unang kuwarter sa iskor nga 19-5.
Grabe kaayo ang gipakitang kamangtas sa Convergys kay ila lamang gipa-iskor ang Calltek og dos puntos sa tibuok second quarter hinungdan nga misaka og maayo ang ilang labaw ngadto sa 24 puntos, 31-7 sa first half.
Ang Convergys nakapanimaho na sa ilang sayong kadaugan human kini milabaw og 30 puntos, 47-17 sa katapusang 10 minutos sa duwa.
Tanang 13 ka magduduwa nga gipasulod sa Convergys pulos nakakuha og puntos.
Si Regg Jalapit maoy nangulo sa Convergys sa iyang otso puntos, si Charles Ben Beatingo mipupo og siyete puntos, samtang sila si Lennart Goricho ug Jayson Codilla mibugha og sayes puntos matag usa.
Samtang upat lamang ka magduduwa ang naka-iskor alang sa Calltek nga gipangulohan ni Jerome Holasco sa iyang 13 puntos.
PUNTOS MATAG USA
Convergys (62) - Jalapit 8, Beatingo 7, Codilla 6, Goricho 6, Lucero 5, Sugatan 5, Villarin 5, Salibay 4, Esteban 4, Rebalde 4, Corbet 4, Fernandez 2, Sarmiento 2.
Calltek (30) - Holasco 13, Ignacio 7, Fernandez 7, Paragoya 3.