Nuggets misakmit korona sa Robinson's cage hoop

Gikalingawan sa Nuggets ang Giants ug ila kining gibuntog sa iskor nga 53-45 aron pagsakmit sa labing unang kampiyonato sa  Robinson's Supermarket Basketball Tournament didto sa Visayan Glass Gym sa barangay Guadalupe, ning siyudad.

Gawas nga mikulit og kasaysayan sa Robinson's basketball tournament, ang Nuggets nakabawos sab ngadto sa Giants, kinsa maoy mipahamtang sa ilang una ug bugtong pilde sa usa ka buwan nga torneyo.

Mipabuhagay sa tanan nilang abilidad sa Nuggets ug ilang napugngan ang Giants pinaagi sa ilang walay tihik-tihik nga depensa ubos nilang Diosdado Inigo ug Finals MVP Manolit Iligan. Apan ang fastbreak ni Arjie Tormis maoy nakaguba sa duwa  sa Giants. Si Tormis maoy topscorer sa Nuggets sa iyang 17 puntos.

Milabaw og tres puntos sa final quarter luyo sa paningkamot ni Marcelo Nemenso, kinsa mibugha og game-high 27 puntos. Apan ang Giants wala makasustiner sa ilang momentum  hinungdan nga nailog sa Nuggets ang tiyempo.

Gawas sa tropeyo, ang Nuggets mibulsa sab og P6,000, samtang ang Giants nakaangkon og P2,000.

Sa laing bahin, si Joan Yu maoy midaog sa free throw shooting contest  batok sa lima ka female officers sa Robinson's Supermarket. Nakadawat sab siya og picture frame gikan sa event sponsor nga K Gallery Frames.

Ang maong torneyo gipasiugdahan ni Sidney Kiamko ug gipadagan ni Jeffrey Jaen.  (Yoyo R. Abayan)