Muling sumandal ang semifinalists nang Harbour Centre sa steady shooting nina Jason Castro at Ty Tang sa payoff period upang igupo ang San Mig Coffee, 86-71 para makalapit sa semifinals ng PBL Lipovitan Amino Sports Cup na nagpatuloy sa The Arena sa San Juan.
Tumapos si Tang ng 14-puntos at 12 kay Castro tungo sa ika-11 sunod na panalo ng mga Batang Pier, ika-13 kabilang ang kanilang tagumpay sa finals ng invitational tournament noong Disyembre at nangangailangan na lamang sila ng isang panalo upang masiguro ang No. 1 position sa semis.
Epektibo rin ang depensa ng Harbour Centre kung saan nalimitahan nila sa pitong puntos ang Coffee Kings sa unang quarter dahilan ng kanilang pagbagsak sa 5-6 kartada.
Nalusutan naman ng Burger King ang mahigpit na hamon ng Noosa Shoes na pinagbidahan ni Noy Javier upang maitakas ang 67-64 at manatiling buhay ang tsansa sa outright semis.
Sumulong ang Whoppers sa 7-6 record sa likod ng 8-4 ng pumapangalawang Hapee habang bumagsak ang Shoe Kings sa 5-7 kartada. (Mae Balbuena)