Misamot kahayag ang kahigayonan sa STVYA ug Ching Hai nga maangkon ang kampiyonato human gipilde ang ilang managlahing kaatbang sa semifinal round 2008 Jeson Guardo Pasalamat Cup basketball tournament didto sa barangay Tisa Sports Complex.
Ang STVYA mipahungaw sa ilang kainit sa maong duwa aron pagpukan sa Atan Guardo-sponsored Hillsview sa iskor nga 74-69, samtang ang Ching Hai mimakmak sa Motra sa iskor nga 103-93.
Sikit kaayo ang engkuwentro sa unang kuwarter, gani nagtabla kini sa iskor, 24-all paghuman sa maong kuwarter. Apan ang STVYA miarangkada sa sunod nga mga kuwarter aron pag-angkon og otso puntos nga bentaha, 58-50 sa katapusang 10 minutos sa duwa. Gikan niadto, ang STVYA wala na molingi aron pag-angkon og singko puntos nga kadaugan. Sa laing duwa, ang Ching Hai yano ra kaayong mipapas sa kuwatro puntos nga alkanse, 38-42 human ang lima sa ilang mga magduduwa ang miposte og double figures aron pag-ilog sa labaw , 60-58. Giinat pa ang ilang labaw ngadto sa siyete puntos, 85-73 ug gikan niadto wala na nila tugoti ang Motra nga makarekober.
Hugtanong gipaluyohan sa Tisa Barangay Council ubos sa liderato ni Barangay Captain Eduardo ‘Eddie’ Cabulao, ang Pasalamat Cup gipadagan ni Erby Diola uban sa pag-abag sa tinahod nga sports patron Jonathan ‘Atan’ L. Guardo, ang presidente sa Uniherb Philippines, ang tiggama sa nabantog na kaayong food supplements sama sa Arthro, Heartvit , Kidneycare ug Diabet.
PUNTOS MATAG USA
Unang duwa:
STVYA (74) - Gelig 19, Caburnay 18, Acosta 8, Russel 6, Caburnay 5, Moreto 4, Ramirez 3, Eyao 3, Bato 3, Tripoli 2
Hillsview (69) - Flordelis 14, Omana 11, Aranas 8, Omana 8, Medalle 8, Enriquez 6, Dayon 6, Tuada 4, Abella 2, Villeza 2
Quarterscores:24-24, 41-37, 58-50, 74-69
Ikaduhang duwa:
Ching Hai (103) - Paguntalan 22, Ceballos 20, Panes 20, Japin 14, Yuzon 11, Solarotio 8, Caballero 4, Amores 1
Motra (93) - Satorre 19, Nacua 17, Castillo 14, Pilapil 10, Enriquez 9, Armohallas 8, Rosal 6, Moral 5, Parsacala 2, Armohallas 2
Quarterscores:38-42, 60-58, 85-78, 103-93